COATL

https://fr.wikisource.org/wiki/Préface_sur_les_Essais_de_Michel,_seigneur_de_Montaigne Bien heureux es tu, Lecteur, si tu n’ez pas d’un sexe qu’on ait interdit de tous les biens, l’interdisant de la liberté, & encores interdit de toutes les vertus, luy soubstrayant le pouvoir, en la moderation de l’usage duquel elles se forment : affin de luy constituer pour vertu seulle & beatitude, ignorer & souffrir. Bien heureux, qui peuz estre sage sans crime, le sexe te concedant toute action, & parolle juste, & le credit d’en estre creu, ou pour le moins escouté. De moy, veux-je mettre mes gens à cet examen, ou il y a des cordes que les doigts féminins ne doibvent, dit-on, toucher : ou bien, eussé-je les argumens de Carneades, il n’y a si chetif qui ne me r’embarre, avec solenne approbation de la compagnie assistante, par un soubsris, un hochet, ou quelque plaisanterie, quand il aura dit, C’est une femme qui parle. Tel se taisant par mespris ravira le monde en admiration de sa gravité, qu’il raviroit d’autre sorte à l’adventure, si vous l’obligiez de mettre un peu par escript, ce qu’il eust voulu respondre aux propositions, & repliques de ceste femelle, s’elle eust esté masle. Un autre arresté de sa foiblesse à my-chemin, souz couleur de ne vouloir pas importuner son adversaire, sera dit victorieux, & courtois ensemble. Cetuy-là disant trente sottises, emportera le prix encore par sa barbe. Cestuy-cy sera frappé, qui n’a pas l’entendement de le sentir, d’une main de femme : & tel autre le sent, qui tourne le discours en risée, ou bien en escopterie de caquet perpetuel, sans donner place aux responces : ou il le tourne ailleurs, & se met à vomir plaisamment force belles choses qu’on ne luy demande pas. Luy, qui sçait combien il est aysé de faire son prouffit des oreilles de l’assistance, qui pour se trouver tres-rarement capable de juger de l’ordre & conduitte de la dispute, & de la force des combatans, ou de ne s’esblouyr pas à l’esclat de ceste vaine science qu’il crache (comme s’il estoit question de rendre compte de sa leçon, & non pas de respondre) ne peult s’appercevoir quand ces gallanteries là, sont fuitte, ou victoire. Cet autre, en fin, bravant une femme fera cuider à sa grand’mere que, s’il n’estoit pitoyable, Hercules ne vivroit pas. Heureux à qui, pour emporter le prix il ne faille que fuir les coups ; & qui puisse acquerir autant de gloire qu’il veult espargner de labeur. https://fr.wikisource.org/wiki/Grief_des_dames GRIEF DES DAMES Bienheureux es-tu, lecteur, si tu n’es point de ce sexe, qu’on interdict de tous les biens, l’interdisant de la liberté : ouy qu’on interdict encore à peu pres, de toutes les vertus, luy soustrayant le pouvoir, en la moderation duquel la pluspart, d’elles se forment ; afin de luy constituer pour seule felicité, pour vertus souveraines et seules, ignorer, faire le sot et servir. Bienheureux derechef, qui peux estre sage sans crime : ta qualité d’homme te concedant, autant qu’on les defend aux femmes, toute action, tout jugement, et toute parole juste, et le credit d’en estre creu, ou pour le moins escouté. Mais afin de taire pour ce coup les autres griefs de ce sexe ; de quelle insolente façon est-il ordinairement traicté, je vous prie aux conferances, autant qu’il s’y mesle ? Et suis si peu, ou pour mieux dire si fort glorieuse, que je ne crains pas d’advoüer, que je le sçay de ma propre expérience. Eussent les Dames ces puissans argumens de Carneades, il n’y a si chetif, qui ne les rembarre avec approbation de la pluspart des assistans, quand avec un sousris seulement, ou quelque petit branslement de teste, son éloquence muette aura dit : C’est une femme qui parle. Tel rebutte pour aygreur espineuse, ou du moins pour opiniastreté, toute résistance d’elles contre son jugement, pour discrette qu’elle se montre : ou d’autant qu’il ne croid pas qu’elles puissent heurter sa precieuse teste par autre ressort que celuy de l’aygreur et de l’opiniastreté : ou parce que se sentant au secret du cœur, mal ayguisé pour le combat, il faut qu’il trame querelle d’Allemand, afin d’esquiver. Et n’est pas l’invention trop sotte, d’acrocher sur les fins de non recevoir la rencontre de quelques cervelles qui peut-estre luy feroient peine à debeller. Un autre s’arrestant par foiblesse à my chemin, soubs couleur de ne vouloir pas importuner personne de notre robe, sera dit victorieux et courtois ensemble. Un autre, derechef, bien qu’il estimast une femme capable de soustenir une dispute, ne croira pas que sa bien-seance luy permette de présenter un duel legitime à cét esprit ; d’autant qu’il la loge en la bonne opinion du vulgaire, lequel méprise le sexe en ce poinct-là, comme je disois. Pourrions-nous estendre ces vers d’Horace, jusques au reproche de ceste espece de desir et de crainte, d’une indeuë approbation ou reprobation populaire ? Nul n’a chery ny redouté, Le faux honneur, ou le faux blasme ; S’il n’a couvé luy-mesme en l’ame, Le mensonge et la faulseté. Suffisance esclave et chetive, qui ne peut et ne veut estre que ce qu’il plaist, ny agir que selon qu’il plaist, à une foule de sots et de foux, car ainsi faut-il baptiser le commun du monde : et plus chetive et catherreuse équité, qui ne faict raison à autruy que selon ses propres interests. C’est bien loin de mener par le nez un vulgaire, que de faire vanité qu’il nous mene par le nez nous mesmes. Suivons. Cetuy-là disant trente sottises, emportera neantmoins le prix, par sa barbe, ou par l’orgueil d’une présomptive capacité, que la compagnie et luy-mesme mesurent selon ses commoditez et sa vogue : sans considérer, que bien souvent elles luy naissent d’estre plus bouffon ou flatteur que ses compagnons, ou de quelque vilaine submission, ou autre vice : ou de la bonne grace et faveur de telle personne, qui n’accorderoit pas une place en son cœur, ny en sa familiarité, à de plus habiles que luy. Cestuy-cy sera frappé, qui n’a pas l’entendement d’appercevoir le coup rué d’une main féminine. Et tel autre l’apperçoit, qui pour l’éluder tourne le discours en risée, ou bien en escopetterie de caquet perpétuel, ou le destord et divertit ailleurs, et se met à vomir pedentesquement force belles choses qu’on ne luy demande pas : ou par sotte ostentation l’intrique et confond de bastelages logiques, croyant offusquer son antagoniste par les seuls esclairs de sa suffisance, de quelque biais ou lustre qu’il les estale. Telles gens sçavent, d’autre part, combien il est aisé de faire profit de l’oreile des spectateurs : lesquels pour se trouver tres-rarement capables de juger de l’ordre et de la conduicte d’une dispute et conferance, et de la force des conferans, et tres-rarement capables aussi, de ne s’esblouïr pas à l’esclat de ceste vaine science que ceux-cy crachent, comme s’il estoit question de rendre comte de leurs leçons ; ne peuvent descouvrir quand ces galanteries-là sont fuitte ou victoire. Ainsi pour emporter le prix, il suffit à ces messieurs de fuir les coups, et peuvent moissonner autant de gloire qu’ils veulent espargner de labeur.

Align Export